قلتووووا لي فادي وجلال هااااا!؟


بالصدفة واني اقلب صفحات محرك بحث من باب (الشجن) لمحت عنوان لخبر يقول (رئيس الحراك الثوري يكشف ... مادري ايش) ضغطت على الرابط وانتظرت الى ان فتح بسلامته وانتوا عارفين كيف الانترنت حق بن دغر ماشاء الله سلحفاة مريضة، المهم فتح واذا بي ارى موقع هزيل اسمه الوطن العدنية اجا على بالي بالبداية انه اسم نوع من انواع الرز مكتوب على جونية، وبعدين فكرت بالاقي اسم كبير تحت المسمي في العنوان رئيس الحراك، قال رئيس الحراك قال، عارفين من طلع المقصود؟؟. طلع اللي مايتسمى او اللي اسمه فادي باعوم، ضحكت ضحكة طويلة جدا وتنهدت وقلت شفاك الله ايها الزعيم باعوم ورد لك عقلك، وتساءلت كيف خلفت هذا الشيء اللي سميته فادي، وعاده الموقع يسميه رئيس، طيب فادي معروف انه يستلم مئات الاف الدولارات من ايران وانه جالس معزب في شقة كبيرة في وسط بيروت نصها بار ، زي مانسمع وكله على حساب ومن ايران ومن نفس اليد اللي تسلم الحوثي الاموال وانه ايران تستخدمه في مشروعها ك "مكنسه" تنظف طريق واوساخ الحوثيين، وهو عارف انه مكنسة واعتقد انهم قالوا له قبل مايهجموا على الجنوب المرة الاخيرة اننا عايزين الحوثيين يسيطروا على الجنوب وعايزين مكانس تشرعن الامر، وقال حاضر ، بكم ؟
المهم هاجم الحوثيون الجنوب وقتلوا وقصفوا وشردوا الشعب والنساء والاطفال وإيران تدعم قتل وسفك الدماء وفادي سكران عند القيادة حقهم ينتظر متى يخلصوا يقتلوا الناس عشان يجيبوه يحكم لهم الجنوب تحت مظلة سيد الشر، كل ذا كلنا عارفينه وعارفين ان فادي تحركه وتديره وتشربه من ذاك الغالي يد ايران وبالتالي يد الحوثي وهو ورقة صغيرة جدا سوداء في ملف الحوثي بمكتب قاسم سليماني مدير مليشيات ايران  في الوطن العربي .
كل هذا عارفينه واكثر، بس الغريب العجيب المريب ان الموقع اللي نشر وكثير مواقع بعدين تبعته وراء الخبر الاهبل لاقيتها وياللمفاجاة كلها المواقع اللي يمتكلها جلال عبدربه هادي، اي والله نعم حق جلال بشحمه ولحمه ويدفع لها ملايين مملينة كل شهر، وتروج لفادي، هيا تعالوا نركز الان، فادي مع ايران والحوثي ،  وجلال ابوه رئيس الشرعية وابوه يعني هادي وهادي هو نفسه اللي حبسوه بصنعاء واهانوه وتابعوه ومسحوا فيه بلاط بيته ولاحقوه ويسمونه الفار، من هم ؟؟ هم اللي يشتغل معهم ولهم فادي باعوم .. كيف هذي ؟ وكيف صارت وكيف اصبحت وكيف امست وكيف اضحت ؟ مدريش.
بس بعد سؤال وتحري واتصالات مكثفة لاشخاص ضليعين ابديت لهم استغرابي قالوا ليش فينك عايشة انتي ؟ قلت والله انشغلت بالجامعة والدراسة الفترة الاخيرة ليش ايش قد تغير؟ قالوا كثير اللي تغير ومنه انه جلال وفادي صاروا اصحاب ويتبادلوا ارسال وشراء المبعوثين بينهم البين وكل واحد يرتب للثاني ويساعدة في عمليات التفريخ ووضع البيض وتوليد كيانات مشوهة وبينهم تميم بن حمد بن موزة مرسال الغرام.
قلتلهم والله غريبة بس مش بعيدة بس سؤال: مش فادي يسب التحالف ليل نهار وداير من بار الى بار في عواصم العالم وكل ماكثر الشرب يسب المملكة والتحالف ولا لا ؟ قالوا نعم صحيح، قلنا طيب مش جلال جالس وآكل وشارب وسارق في الرياض ويمول حقة الالف الف مفسبك وموقع وحانة من هناك ؟ قالوا نعم.
قلنا طيب كيف هذه المواقع تروج لفادي وهو صبع مدري ظفر صغير وسخ في اليد الايرانية النجسة اللي تقتل وتشرد وتهدد وترفس المنطقة بكلها ؟
قالوا مدري، الا انه وجب تعريف الاشقاء، وفضح المؤامرة أمامهم، قلنا والله اللي مش شايف انه فادي وجلال يتاجروا من زمان بقضايا ودماء الناس يبقى اعمي او مش عايز يشوف ..ولا الامر مبين كما الشمس الحارقة هذه، الهي اجعلها تحرق فادي وجلال وكل سارق ومتاجر بدماء وقضايا الشعوب قولوا آمين، والمعذرة كلمتكم باللهجة العادية العامية لان لا الموضوع ولا فادي ولا جلال يحتاجوا لأكثر من كذا،،