بعد مرضه.. رامي جمال يبدأ حملة توعية بـ البهاق
بدأ الفنان رامي جمال حملة توعية بمرض البهاق وأسبابه، كما تضمنت الحملة دعوة لـ"فضح" الشركات التي ترفض تعيين مرضى البهاق.
وكتب رامي عبر جميع حساباته على مواقع التواصل الاجتماعي: "البهاق، تعالوا كل يوم نعرف حد حاجة عن الموضوع ده، أولا ده مش معدي، وده بيبقي نقص في الخلايا الصبغية وده مرض مناعي، لو اترفضت في شغل بسببه، ابعتلي ونعرف الناس اسم المكان اللي مفيهوش إنسانية، لو أنتِ أو أنت اترفضتم من اللي هتتجوزوه بسببه أنتم الكسبانين اللي يبص علي لون جلدك قبل لون قلبك إنسان فاضي ميتعاشرش".
وأضاف: "لو في مدرسة وأصحابك مش فاهمين ده أيه متزعلش أحنا نعرفهم ده أيه، المدرسين يعرفوهم ده أيه، وأكيد هيقدرو إن ربنا ميزنا، البهاق مش مرض، البهاق ترجمة توتر وقلق وضغط فياريت كل الناس اللي عندها يبقي عندها الحظ اللي شفتوا منكم والدعم اللي شفتوا منكم، من ساعة ما كتبت والتليفزيون مبيتكلمش غير عليه، دكاترة جلدية مشكورين عرضوا علاجي، وأنا بقولكم كتير أولى مني بالعلاج المجاني".
وكشف المطرب الشاب رامي جمال عن إصابته بمرض البهاق، عقب ظهور بقع بيضاء اللون في مناطق بجسده، قائلًا إنه ذهب لعدد كبير من الأطباء إلا أنهم لم يجدوا حلولًا لها.