القصة الكاملة لمحاولة اختطاف الفنانة مي حسن.. قفزت من السيارة في آخر لحظة
تعرضت الفنانة المصرية مي حسن، لمحاولة اختطاف على يد سائق إحدى الشركات الخاصة، وهو ما كشفت الفنانة تفاصيله اليوم الأحد عقب تقدمها ببلاغ لوزارة الداخلية المصرية، وهو ما أكدته مي حسن بقولها إن الشرطة :" تواصلت معها لسرعة ضبط الجاني".
ماذا قالت مي حسن عن محاولة اختطافها؟
أكدت الفنانة مي حسن تعرضها لمحاولة اختطاف على يد سائق التاكسي بقولها: " الحمد لله الحادثة عدت على خير وفتحت باب العربية والسواق فرمل مرة واحدة، وبعدين نطيت من العربية، وصوتي كان عالي والناس اتلمت ولقيت السواق بيهددني وبيقلي لي حطي لسانك في بقك لأدفنك مكانك "
أكدت الفنانة مي حسن في تصريحات لها أنها طلبت سيارة من إحدى الشركات الخاصة لتوصيلها من مول مصر إلى حدائق الأهرام ولما ركبت معاه فوجئت به يغير الطريق ويدخل في شوارع ضلمة وأماكن بها عمارات تحت الإنشاء ولكن الحمد لله الناس اتلمت وأنقذوني منه ".
مي حسن تكشف تفاصيل محاولة اختطافها
ونشرت الفنانة مي حسن بوست عبر صفحتها على موقع التواصل الاجتماعي فيس بوك كشفت فيه التفاصيل الكاملة لمحاولة اختطافها بقولها:" أنا كنت روحت مول مصر لسحب فلوس من هناك ولأني مش معايا عربيتي طلبت عربية من شركة خاصة، وفي الذهاب من الحدايق لأكتوبر دفعت 32 وأنا راجعة بطلب الأوردر محدش وافق بـ 32، كان فيه 3 أو 4 وافقوا بـ 42 واخترت واحد منهم".
وأضافت حسن :" كنت راجعة الساعة ستة ونص مساء، وكان السائق مصمم يدخل من البوابة التالتة، وأنا ساكنة في الرابعة، قلت له اللوكيشن مش مظبوط في الحدائق وأول ما دخلنا جاتني مكالمة من جوزي وهو في العراق حاليا وكلمني، وفجأة السواق دخل شارع يمين وداس 80 ولاقيت العربية بتجري، وعاملة تراب، أنا مش فاهمة فيه إيه فرميت التليفون وقلت له بعصبية إيه مدخلك هنا، وكان لا في دماغي خطف ولا حاجة، وقلت له هفتح العربية وأنط، قال لي خسارة انتي حلوة وكل ده وجوزي على التليفون معايا".
وأشارت مي إلى أنها قامت بالقفز من السيارة قائلة :" فتحت باب العربية وفرمل مرة واحدة، ونطيت من العربية، وصوتي كان عالي قلت له إنت بتستهبل انت بتدخل في الضلمة عايز تخطفني هوديك في داهية، الحمد لله الشارع كان فيه عماير لسه بتتبني وسور خزان وكان فيه عمال الناس لما نزلت شايفني وتدخلوا بيشدوه، والسواق قال لي حطي لسانك في بقك لأدفنك مكانك، ولما لاقيت ناس بدأت أخد نفسي بالعافية، وكان بيحاول يفهم الجميع إني مش عايزة أدفع الأجرة، والحمد لله قبل ما أرد واحد سمع كلمة إنه عايز يخطفني وكنت منهارة عياط".
تابعت :"هددته إني هبلغ البوليس، وكان رده أنا مش مسجل خطر، وطلبت الشرطة وطلبوا مني رقم العربية، أول مرة أكلم الشرطة كمواطنة عادية، وبعدها كلمني مأمور قسم الهرم وحكيت اللي حصل والحمد لله بشكر القضاء وكل اللي ساعدني في الأزمة".
يشار إلى أن مي حسن كانت أولى أعمالها المشاركة في مسلسل "أزمة نسب" عام 2016، من بطولة الفنانة زينة وريم البارودي.
كما شاركت مي حسن في مسلسل "البرنسيسة" الذي جرى عرضه في شهر رمضان، عام 2019، وكان المسلسل من بطولة الفنانة مي عزالدين، وشاركت كذلك في فيلم "استدعاء ولي الأمر" بمشاركة عدد من الفنانين، منهم: حورية فرغلي ومحمد عز وسماح أنور وصبري فواز.