أول تعليق لـ دنيا سمير غانم بعد غنائها أمام الرئيس السيسي في احتفالية قادرون باختلاف

وجهت النجمة المصرية دنيا سمير غانم رسالة شكر للرئيس المصري عبد الفتاح السيسي، بعد دعمه لها خلال مشاركتها في احتفالية "قادرون باختلاف" التي أقيمت أمس بمشاركة ذوي الهمم.

ونشرت دنيا عبر حسابها الرسمي بموقع "انستجرام" صورا من الاحتفالية، وعلقت:" تشرفت النهارده بالغناء أمام سيادة الرئيس عبد الفتاح السيسي في احتفالية قادرون باختلاف، وسعدت و تشرفت بكلامه ليا جدا وبنظرته اللى كلها أبوة"

وأضافت: "أحب أشكر الجمهور العظيم اللي دايما بيشجعني وشفت في عنيهم وفي ردود أفعالهم فرحتهم بوجودي في الحدث الهادف مع الملائكة اللي كانوا سبب في ثقتي بنفسي انهارده بإحساسهم الصادق في تعبيرهم عن حبهم ليا الحمد لله وفرحتهم باليوم ده وان فى حد مهتم بيهم وبيفكر فيهم وفى احتياجاتهم"، وتابعت "وبشكر كل الزملاء والأساتذة إلي اتشرفت إني كنت موجودة معاهم في نفس الحفلة و علي رأسهم الموسيقار الكبير عمر خيرت وأستاذ أشرف عبد الباقي سعيدة جدا إني ابتديت يومي بتشجيعهم وحرصهم انهم يطمأنوا عليا قبل ما أطلع و كمان زملائي الأعزاء مصطفي شعبان ويوسف الشريف والمذيعين شريف مدكور وإيمان الحصري اللي مروا بظروف صعبة وعدوها بكل قوه وثبات بفضل ربنا ورحمته و كنت مبسوطة بيهم و حسيت بأد إيه أغلب الموجودين مننا كان عندهم تحديات في حياتهم زي الملائكة اللي استمددنا قوتنا منهم انهارده ومن أهلهم الأبطال".

وتابعت دنيا سمير غانم: "بشكر كل القائمين علي الاحتفال د/أمل مبدا الأم التانية للقادرون باختلاف، فخورة جدا بأخويا هشام جمال لإنه اشتغل وتعب من قلبه في إخراج الحفلة والأغاني واختيار الأصوات اللي دخلت قلوبنا كلنا وعن نفسي بشكره علي أغنيتي "بلادي اسلمي" كلمات الشاعر الموهوب محمد إبراهيم وألحان العبقري المتنوع هشام جمال وتوزيع الموزع الشاطر جدا مادي".

واختتمت دنيا حديثها قائلة: "وفي النهاية حبايبي الغاليين بابي ومامي تأثرت جدا النهارده أنى لأول مرة أروح في يوم مهم ليا من غير ما أسمعك يا مامي بتدعيلي أو ترقيني قبل ما أنزل أو بابي بيقول لي ربنا معاكي يا حبيب بابي، يا رب أكون شرفتكم، بحبكم و وحشتوني أوي، ربنا يرحمكم يا أغلي حاجة في حياتي".

ويعتبر هذا الحفل هو أول مشاركة فنية لدنيا بعد وفاة والديها النجمان المصريان سمير غانم ودلال عبد العزيز؛ حيث رحل عن عالمنا الفنان سمير غانم يوم 20 مايو الماضي متأثرا بإصابته بكورونا، فيما توفت دلال عبد العزيز يوم 7 أغسطس الماضي إثر مضاعفات فيروس كورونا.