شريفة ماهر تتهم ابنها بضربها والاستيلاء على ممتلكاتها (فيديو)

عادت الفنانة المصرية المعتزلة شريفة ماهر للأضواء من جديد، خلال حلولها ضيفة مساء أمس على برنامج "90 دقيقة" على قناة المحور تقديم الإعلامية بسمة وهبة، وتطرقت في حوارها لحياتها الآن بعيدا عن الشهرة ومشاكلها مع أولادها.

وقالت شريفة ماهر إنها تملك الجنسية السويدية لكن تفضل الإقامة في مصر دائمًا "مش بطيق أقعد هناك شهر"، وعن مشكلاتها مع أبنائها، أضافت:" وزعت جزءا كبيرا من ميراثى، شريف وطارق شتمونى، شريف زقنى مرتين ودراعى اتكسر من 4 سنين، ولادى أخدوا كل اللي حيلتى".

وعن ابنتها ناهد، قالت:" مش حنينة، وقلبها جامد علىّ، أجمد من إخواتها، دى ما سألتش علىّ، وشريف طول عمره بيحب الفلوس أكتر من أبوه وأمه، بيعبد القرش".
 
وأشارت إلى أنها اعتزلت الفن وارتدت الحجاب منذ 45 عاما، وأطلقت عددا من المشروعات العقارية، وعن ذكرياتها الفنية قالت: "فى فيلم أعز الحبايب شكرى سرحان ضربنى بالقلم وعينى جابت دم، وما بقتش أشوف كويس، ودلوقتى شريف ابنى استغل الحكاية دى، ومضانى على 4 عقود لأملاكى ما أعرفش فيهم إيه".

وتابعت: "مش هشتكيه، ربنا هيجيب لى حقى، أبوه قبل ما يموت قال لى هأمّنك عشان شريف لما أموت هياخد منك كل حاجة، وفعلا طول عمره بيعبد الفلوس، وما كنتش أتخيل إنه يعمل فىّ كده، ده بقاله 9 شهور ما قاليش انتى فين".
 
واختتمت بأسى: "ده طردنى من شقتى الإيجار، ودلوقتى قاعدة فى عمارة كاتباها باسم بنتى نيفين، وحد قال لى إن شريف طلب الفيلا من الشهر العقارى رغم إن نيفين مسجلاها، وفعلا استولى عليها وخان الأمانة".

ودخلت شريفة ماهر في مشادة مع ابنها على الهواء، بعد محاولته الدفاع عن نفسه، والذي اتهم والدته بالتزوير أيضا في شهادة ميلادها وبالافتراء عليه، وقال إن التحقيقات أثبتت تضارب في أقوالها وعدم صحة اتهامها له بالاعتداء عليها.

وقال ابن شريفة ماهر أنه حرر محضرا ضد والدته لكي لا تتعرض لممتلكاته، وأضاف أنه لا يعرف سبب هجومها عليه واتهامها له بالاستيلاء على ممتلكاتها وأكد أحقيته في هذه الممتلكات، مشيرا إلى انه على تواصل معها ويرسل إليها الطعام وما تحتاجه للعيش كل شهر.

لترد الفنانة المصرية:" الله لا يكسبك يا بعيد، ورينا الأوراق مش الكلام، أنا مش مضيت لك على حاجة، انت اللى مضيتنى، انت سلطت البواب علىّ، وقلت له ما يجيبليش حاجة ويقول للناس إن عندى زهايمر، حسبي الله ونعم الوكيل فيك، ربنا ينتقم منك".

ليعود نجل شريفة ماهر ويقول:" إيدى تتقطع قبل ما أمدها، لكنى اشتريت الشقق اللى عليها المشكلة، وعامل صحة توقيع منذ 2007، والمهندس اللى بنى العمارة معها شهد على هذه العقود، بتقول بايعة لبنتها منذ 2011، إزاى هغير عقد البيع اللى هى عاملاه؟ اديتها فوق المليون جنيه وفوق الـ100 ألف جنيه سمسرة فى الفيلا اللى باعتها".

وأكد شريف أن أمه حررت محضرا ضده، واتهمته بضربها وسبها وكسر الشقة، دون وجود أى إصابات، وهو ما يتضارب مع روايتها الآن التى تقول فيها إنه تسبب فى كسر ذراعها منذ 4 سنوات، موضحًا أن النيابة حفظت المحضر.

شريفة ماهر فنانة مصرية لمعت في فترة الستينيات وقدمت عدة أدوار شهيرة مثل أفلام "اديني عقلك" و"أعز الحبايب" و"الفانوس السحري" و"اسماعيل ياسين في البوليس" وغيرها، وعملت أيضا كمغنية بعدما اكتشفها الموسيقار محمد عبد الوهاب في بداياتها الفنية.