في ذكرى رحيله.. ابن محمود عبد العزيز يوجه رسالة لجمهوره
نشر المنتج والفنان محمد محمود عبد العزيز نجل النجم الراحل محمود عبد العزيز صورة له مع والده على حسابه بموقه "انستجرام" في الذكرى الثانية لرحيل "الساحر" محمود عبد العزيز، وعلق على الصورة قائلا:"برضه هتصور مع حضرتك وهتجمعنا صور جديدة".
وعن سبب نشره للصورة، قال محمد محمود عبد العزيز:"بصراحة الصورة دى ماكنتش متصورها عشان أنزلها على السوشيال ميديا، كنت عاملها ليا أنا بس عشان أحطها على موبايلى وأعلقها فى بيتى وشركتى، بس قلت لنفسى إن أكيد فى ناس كتير عاملة زى حالاتى وليها حد غالى عليها بعيد عنها، أيا كان نوع البعد حتى لو مسافر مدة طويلة".
وأضاف: "نصيحتى.. اعمل زى ما أنا عملت، اتصور صورة حلوة مع صورة حلوة للشخص الغالى عليك، ولو كان مسافر ابعتهاله وعرفه قيمته عندك وحسسه بحبك ليه، ساعتها أكيد هيفرح وانت كمان هتفرح وهتقصر بينكوا المسافات مهما طالت".
وتابع عبد العزيز: "العمر مهما طال قصير، اللى انت حاسه قوله واللى بتحبه قوله بحبك فى وشه، صدقنى ممكن بكره ماتلاقيهوش، أما لو الغالى عليك المسافة اللى بينك وبينه أبعد من السفر، أكيد برضه هيحس وهيفرح وأنت كمان هتفرح انك معاه فى صورة جديدة حتى لو مع صورته".
واختتم عبد العزيز، قائلا: "أسألكم الفاتحة والدعاء لأبويا ولكل من رحلوا عنا".