أبرز تصريحات الفنانة فيفي عبده في لقاءها بالإعلامي عمرو أديب

حلت الفنانة المصرية فيفي عبده ضيفة على الإعلامي عمرو أديب في برنامج "الحكاية" المذاع على شاشة MBC مصر، وأثارت فيفي موجة من الجدل بعد تصريحاتها الأخيرة في البرنامج.

وقالت فيفي فى حوارها : "الرقص لغة لا تحتاج لترجمة والشعوب كلها تفهمها .. والدليل على ذلك أنني مثلت مصر في دول أجنبية كثيرة وظهرت في نشرة التلفزيون الألماني".

وأضافت: "الرقص مهم جدا والدليل إننا لو مشوفناش عيل بيرقص في بطن أمه بنقول إنه مش عايش .. الرقص عامل زي الويسكي بيظبط الدماغ وكل الوفود الأجنبية بتيجي مصر من أجل الرقص بتاعي ، وبيسألوا عليا من وهما في المطار".

وتابعت: "عبارة (5 أمواه) من اختراعي ومسجلة باسمي في الشهر العقاري وقمت بابتكارها حين دخلت السوشيال ميديا"

وعن أزواجها، قالت فيفي :"جوزي قالي مرة كلمة واتهمني اتهام.. كان ذلة لسان.. اتطلقت منه بسبب الكلمة دي واتجوزت الراجل اللي قال عليه لمدة سنة ونص، وبعدين اتطلقت منه ورجعت لجوزي اللي قال الكلمة دي تاني عشان بنحب بعض.. بس كنت عاقبته بجوازي ده وعرفته إن كل كلمة ليها وزنها”.

أضافت “عبده” أن الرجل مهما قام بنزوات إلا أنه يأتي مرة أخرى إلي ملجأه الأصلي أي زوجته وحبيبته الأولى، مستطردةً: “أنا زي الفريك محبش شريك وعمري ما أكون زوجة تانية.. مقبلش إن جوزي يتجوز عليا ولو عملها أطير رقبته حتى لو عاملي إيه”.

ووجهت الفنانة فيفى عبده نصيحة للسيدات، قائلة: "مفيش حد بيطول منى كلمة، يعنى أنا ممكن أصاحب رجالة وما أصاحبش ستات، والرجالة مش هياخدوا منى غير اللى عاوزة أديهوله، عاوز بصة أو غمزة، لكن مش هتقدر تاخد منى أى حاجة غصب عنى". 

وتابعت خلال لقائها مع الإعلامى عمرو أديب: "الست زى التعبانة مع الست مش عاوزاها تبقى أحسن منها" وقالت فيفى إنها تعبت كثيراً فى حياتها وتعلمت أشياء كثيرة، مردفةً: "إنت شهادتك كل الناس واخداها.. أنا شهادتى لا لأن شهادتى شهادة الحياة، الدنيا علمتنى، أنا قعدت مع الغلبان اللى مش لاقى ياكل وقعدت مع الناس الكبار".

وأضافت: "أنا عندى 150 عازف، وكنت أخش البروفة يقولوا المدام جات، وألاقيهم واقفين كلهم"، مستطردة: "أنا عمرى ما شربت حاجة.. أنا مبحبهاش، ولا سجاير، لكن الشيشة اتعلمتها عشان كنت بعمل فيلم المزاد، وخليت محمد الدراوى جوزى يعلمنى أشرب الشيشة إزاى عشان أعمل الفيلم".

وأردفت فيفى عبده: "أنا بحب البلاد العربية وطول عمرى برقص لهم، وبحب أحلام، ومحمد عبده، عشان ملقتش رقاصات رجعت أرقص تانى"، مستطردة: "الرقص لغة مش محتاجة ترجمة، لما بييجى وفد لمصر احنا كنا بنمثل مصر برة، ووزارة السياحة كانت بتبعتنا، رحت الأرجنتين وألمانيا وتحدثت عن مدى أهمية الرقص الشرقى".

وأوضحت فيفى عبده أنها لا تحب الرجال البخلاء، موضحة أنها تحكم على الرجال من ملابسهم، وأخلاقهم.