أول رد من أحمد إبراهيم على منتقديه بعد زواجه من أنغام

وجه الموزع الموسيقى المصري أحمد إبراهيم عبر حسابه الشخصي بموقع "فيسبوك"، رسالة لجميع منتقديه بعد زواجه من الفنانة أنغام.

وكتب أحمد إبراهيم: "دي رسالة لكل حد هيتجاوز من هنا ورايح، أولًا بشكر كل صحفي وإعلامي احترم رغبتي في عدم التعليق على الكلام الكتير أخر فترة، لكن واضح إن السكوت عند بعض الناس بقى يتفهم غلب وخوف ومحدش بيقدّر احترام الواحد لخصوصياته، أنا بعرف اتجاهل على فكرة وكنت سكت طول الفترة الاخيرة ورفضت ألف برنامج للرد على تجاوزات في حقي وحق زوجتي الثانية أو اتهامات كاذبة في حق زوجتي الأولى منسوبة ليا واتهامات من ناس عاملين "حبايب وقرايب"، بيسخنوا الدنيا ضدي وضد زوجتي الثانية غيرة وغل لكن ربنا الحافظ".

وأضاف الموزع الموسيقى أحمد إبراهيم : "سكت لإني كبير وأعرف أدير بيتي إزاي ومش من هواة الرد و١٧ سنة شغل لا جريت على مادة ولا شهرة لإني شبعان ولإني بتقي الله وبستخيره في تصرفاتي وبأخد قراراتي بنفسي واللي عارفني عارف مين أحمد إبراهيم، اللي في الصورة معايا دي مراتي وحطاني فوق دماغها وبترضيني قبل ما تبقى نجمة وأهم مطربات مصر والوطن العربي، محدش بيجبر حد على حاجه واللي في الصورة معايا لا خدتني من بيتي وولادي ولا خربيت بيت حد ولا ألف شخص يقدروا يحرموني من ولادي، ولادي في حضني هما و أمهم "بنت الأصول" في رقبتي وعايشين في خيري و من عرقي ومحدش أشتكى عشان حضرتك واللي زيك يشحت بيهم و الحمد لله ولادي زي الفل ومعايا ومامتهم فوق دماغي وشايلة لسه اسمي ووش الخير عليا وسواء كملنا او انفصلنا هتفضل أم ولادي وكله نصيب ومش ضعيفة عشان حد يدافع عنها".

وتابع إبراهيم : "اللي قدامك وبتقول عليه قد ابنها، ده عنده ٣٦ سنة ومخلف ولدين واحد فيهم ٨ سنين ومتجوز ٢ وفاتح بيتين، واتمرمط واشتغل ألف شغلانة وهو صغير وبيساعد في فتح بيوت كتير بفضل ربنا من صغره، وفرق السن يا جاهل اللي بيني وبين مراتي ١١ سنة يعني أقل ٤ سنين من الفرق اللي بين السيدة خديجة والنبي، أنا صاحب أهم بصمات ونجاحات ناس أكبر منه في السن ماحققوش ربعه و بفضل الله أعلى سعر موزع موسيقى حاليا مع اتنين تلاتة كمان من جيله على مستوى الوطن العربي".

وواصل إبراهيم: "كفاية متاجرة بولادي وأمهم، ونواح وعياط بحياتنا الشخصية، محدش طلب تدخلكم في أمور بيتي ولا حد يعرف أسرار البيوت، أولادي أو أي واحدة من زوجاتي الأثنين عايشين من عرقي أنا، وقادر أتجوز كمان أثنين لو عاوز الحمد لله، من هنا ورايح اللي هيوصلي أنه غلط فيا أو جاب سيرة أي واحدة من اللي في رقبتي أو تاجر وشحت بحكايتها أنا همسح بيه الأرض ومش هكتفي بالقضاء أنا لا جاي من نيو جرسي ولا متربي في بقي معلقة دهب أنا من بورسعيد وتشقيت وواخدها من تحت وبعرف أرد بأدب وبعرف اَسب وأضرب كمان لتدخلك في حياتي الشخصية والسخرية مني ومن مراتي".

وكانت النجمة أنغام أثارت الجدل بعد إعلان زواجها من الموزع أحمد إبراهيم منذ شهر ونصف تقريبا بسبب زوجته الأولى إبنة شقيقة المخرج طارق عريان، بعد طرحها ألبومها الجديد "حالة خاصة جدا" وتعاونت فيه مع عدد كبير من الشعراء منهم نادر عبدالله وأمير طعيمة، صابر كمال، أحمد المالكى، سلطان صلاح أما الملحنين فتعاونت مع كل من: خالد عز، إيهاب عبد الواحد، هشام بولس، تامر عاشور، مصطفى العسال، محمد عبية، بينما تعاونت مع الموزعين: أحمد إبراهيم، مادى، طارق عاكف، توما، وغيرهم.