تامر حسني يغني باللهجة الصعيدية في ألبومه المقبل (تفاصيل)

سجل المطرب تامر حسني أغنية "اللي يجاور السعيد"، ضمن ألبومه الجديد، وهي الأغنية التي يغنيها تامر بالصعيدي.
وعن كواليس الأغنية كتب مؤلفها عبر صفحته الخاصة بـ"فيسبوك": "من حوالي ٣ سنين أو أكتر، كنت قاعد أنا وأحمد المالكي وشريف بدر في المهندسين، وفي نص القعدة شريف قال لي تامر حسني بعتلي تراك مزيكا عايزني أعمل عليه لحن، وبما أن كان حد مننا اللي هيكتب اللحن بعد ما يتعمل فقلتله طيب سمعنا كده، فشريف شغل تراك المزيكا، أنا انبهرت بالجمال والاختلاف وقلت لمالكي سيبلي الطلعة دي، قاللي دوس، وقلت لشريف اللحن اللي لسه متعملش ده لما يتعمل أنا اللي هكتب عليه، وتراك المزيكا ده حالة غريبة وجديدة ومينفعش الكلام اللي هيتقال عليه يبقى كلام عادي، فهيتكتب صعيدي أو نوبي".
وأضاف" قعدنا نتناقش في الموضوع والقعدة اتمحورت حوالين تراك المزيكا، قومنا قعدنا في مكان تاني، كل ده وشريف بيسمع تراك المزيكا، شوية وشريف خد الموبايل وقام، وخمس دقايق ورجع قاللي اللحن اتعمل وبعتهولي، قعدت وأنا مروّح عمال أسمعه، وأقول لنفسي أنت عرضتها قوي كده ليه هو أنت كتبت صعيدي ولا نوبي قبل كده!، من تاني يوم قعدت على اللحن وبعد ما خلصت جزء منه كلمت شريف وقلتله خدلنا ميعاد من تامر نروحله لأن اللي اتكتب مينفعش أكمل فيه قبل ما أعرف هو هيوافق على السكة دي ولا لا، شوية وشريف كلمني قاللي يلا هنروح لتامر الساعة كذا".
وأكمل كمال "روحنا لتامر وبعد الاستقبال الجميل والسلامات بصلنا بضحك وقال فيما معناه يارب تكون مجيتكم بفايدة
وقعدنا وشرحت لتامر وجهة نظري الأول، وبعدين شريف سمعه اللحن والجزء اللي كتبته، بعد ما خلص تامر قاله عيدها تاني، وبعد ما عادها بصلنا بنظرة تقدير وقال براڤو عليكم، ومسك الكلام وقعد يفنط فيه ويقوللي هنخلي دي في الاول ودي كوبلية ودي هنعيدها ،قلتله لا اللي مكتوب ده كله المذهب، لسه هيتعمل قده مرتين تاني، قاللي هتعرف تعمل زي اللي كتبته ده مرتين تاني وبنفس الكواليتي؟ قلتله هيحصل، ومشينا وأنا بقول لنفسي أنت عرضتها ليه تاني".
وتابع : "وبعدها بكام يوم تامر بعت قاللي فين الكلام واستعجلني وأنا مكنتش لسه كتبت، قعدت ٣ أيام متواصلين بلا نوم أنا والقهوة والسجاير لحد ما خلصت وبعت الكلام لتامر ورد عليا بكلام حلو كتير نساني كل التعب والإرهاق الذهني والبدني اللي حصل، في ألبوم تامر حسني الجديد هتسمعوا أغنية مهمة وتجربة جديدة ( إن شاء الله ) اسمها ( اللي يجاور السعيد )ألحان شريف بدر، توزيع توما".