أول تعليق لحسن شاكوش بعد قرار إلغاء تصاريح مطربي المهرجانات

الاثنين 17 فبراير 2020 14:54:00
أول تعليق لحسن شاكوش بعد قرار إلغاء تصاريح مطربي المهرجانات

رد المطرب حسن شاكوش، مغنى مهرجان "بنت الجيران"، على قرار الفنان هانى شاكر نقيب الموسيقيين في مصر، بإلغاء تصاريح مطربي المهرجانات قائلًا: إنه سبق له أن اجتاز امتحانات النقابة ونجح فيها، وغنى أمام النقيب، الذى أشاد بصوته وادائه. 

وقال "شاكوش" خلال مداخلة هاتفية ببرنامج "الحكاية" مع الإعلامى عمرو أديب، :" سألتزم بقرار نقيب الموسيقيين وراض عنه، ولا يوجد أي مشكلات فى ذلك.. وقد وعدت الفنان هانى شاكر من قبل بتغيير كوبليه خمور وحشيش"، معقبًا: "فوجئت خلال الحفل الأخير بإن النسخة الأخيرة شغالة.. ورحمة أبويا مضيت تعهد بأن أى كلام إسفاف مش هقوله.. يمكننى غناء كل الألوان".

وواصل: " كنت لاعب كورة ومتعلم، وكنان حلم حياتى أن أمثل مصر، ولكن لم يكرمنى الله فى الكرة، وشعرت بذلك خلال الحفل الأخير باستاد القاهرة.. هذا الحفل مش مباراة اعتزال.. وبداية مسيرتى".

وتابع: "اتظلمت واتبهدلت في الكرة.. ومحدش عارف حاجة.. والدتى تعبانة وبصرف على أهلى وشايلى أخواتى كلهم"، مشيرًا إلى أنه حصل على مقدم حفلات ووقع عقود وشروط جزائية، مستطردًا :" دى أول غلطة.. وأنا مش عارف أعمل إيه؟".

وحكى شاكوش كواليس غنائه باستاد القاهرة في عيد الحب: "الحفلة النجوم اللي كانوا موجودين في الحفلة كلهم راحوا عملوا بروفة قبلها بيوم، وأنا وعمر كان عندنا في بورسعيد وطلعنا على الإسماعيلية، وطلعنا على حفلة الاستاد على طول، وأول ما روحت الاستاد دخلت الأوضة وجالي اتنين قالوا لي مفيش أي خلافات بينك وبين عمر وعاوزين شكلكم يطلع كويس قدام الجمهور، وقدام الناس ومفيش أي مشاكل".

وأضاف: "اديت الدي جي الفلاشة اللي عليها النسختين منها النسخة اللي وعدنا أستاذ هاني شاكر إن الكوبليه فيها يتغير وغيرناها، وحطينا النسختين على الفلاشة والبلاير بتاعي لما طلع لبتاع الدي جي شغل النسخة القديمة".

وعن كواليس حفل الاستاد، قال: "المفروض إننا داخلين الاستاد المفروض يتحط لنا في ودانا إيربيس عشان نسمع المزيكا ونغني، وبعدين إحنا اتفاجئنا إن فيه كاميرات ودخلت الاستاد وغنينا أنا وعمر، ودخلت عشان أفرح كل الناس دي اللي بتحب حسن وبتحب عمر ومش رايح علشان مقابل ولا عشان أي حاجة، والدليل إننا هنغير الكوبليه بدل خمور وحشيش نقول: من غيرك ما عارف أعيش وأنا مضيت تعهد بكده، ولما روحت النقابة اختبرت أن أي كلام فيه إسفاف بعد كده مش هقوله، ومضيت التعهد ده في النقابة بعد ما أغنية (بنت الجيران) نزلت الشارع".

وعما فعله بعد حفلة الاستاد، قال شاكوش: "أنا بعد ما روحت وخلصت الحفلة وربنا كرمني وقولت أروح أدبح وأطلع حاجة لله من كتر مانا فرحان".

وأشار إلى أنه سيتعرض لمشاكل كبيرة بسبب قرار هاني شاكر، "أنا واخد عرابين شغل من ناس، والناس بتكلمني وبتهددني إنهم مش هيسيبوني، وإحنا واخدين فلوس وعرابين وماضيين عقود وشروط جزائية، وحفلات برة مصر، وأنا مش عارف هعمل إيه!، وأنا وعمر اللي شيلنا الليلة".