بسبب عمرو دياب.. تامر حسين يكشف عن خلافاته مع عمرو مصطفى
قال الشاعر تامر حسين إنه سعيد بالعمل مع الهضبة عمرو دياب في حوالى 51 أغنية في مشواره الغنائي، موضحا أن "الهضبة عنده طاقة وأمل وتحدى كبير وشايل الصناعة على كتفه، وتعلمت الكثير من الهضبة الكثير في مجال المزيكا".
وأشار حسين، في حواره مع الإعلامي رامي رضوان، ببرنامج "مساء dmc"، مساء الجمعة، إلى أنه قدم عددا كبيرا من الأغانى الوطنية ويعتز بها كلها، ومن ضمنها "تحيا مصر" للمطرب أحمد جمال وغيرها.
وقال الشاعر تامر حسين إن الملحن عمرو مصطفى هو أول من قدمه في الوسط الغنائي، وله فضل كبير عليه، ويعتبره بمثابة شقيقه وكلماته نالت إعجاب مصطفى، حيث علق حسين قائلا: "عمرو مصطفى قالي ذوقك حلو".
وأضاف حسين، خلال حواره ببرنامج "مساء DMC" مساء الجمعة: "رغم كده لكن أنا حاليا زعلان منه على المستوى الشخصي، زعلان من عمرو مصطفى صاحبي وأخويا، هو عشرة 15 سنة، عشنا مع بعض أكتر ما عشنا في بيوتنا، ووالدته زي أمي، وأمي كذلك بتتخانق معايا عشان في زعل بيني أنا وعمرو".
تابع: "أنا عمري ما هنساله إنه أول واحد وقف جنبي في عزاء والدي، لكن أنا زعلان منه في حاجات كتير أوي، أنا كنت بعدي حاجات كتير أوي عشان هو صاحبي وده واجب الصداقة والعيش والملح، كنت بستحمل موقف واتنين وتلاتة، لكن أنا زعلان لأنه حكى حاجة عني مش مظبوطة خالص، وكمان مشاكلنا متتحلش على السوشيال ميديا، وأنا مش حابب إن شكلنا يبقى فيه شد وجذب على مواقع التواصل".
استكمل: "هو اتهمني بالباطل في مشكلته مع الفنان عمرو دياب إلا أنا أصلا مش عارف إيه سببها، وأنا رغم زعلي منه عمري ما عاتبته، وهو مهما قال على السوشيال ميديا عمري ما هرد بنص كلمة، حتى لو أساء ليّا، أنا عارف اللي في قلبه ليّا، وأنا بتمناله كل التوفيق ويارب دايما يكسر الدنيا".
