مصطفى درويش يوضح سبب مطالبته لفنانة مصرية بدلًا من هند صبري للمشاركة في موكب المومياوات

أعرب الفنان المصري مصطفى درويش عن انزعاجه من مشاركة الفنانة التونسية هند صبري في موكب نقل المومياوات الملكية من المتحف المصري لمتحف الحضارة.
وكتب "درويش"، عبر حسابه بموقع "فيسبوك": "طبعا مع حبي واحترامي وتقديري الكبير لهند صبرى وفنها، بس هو 100 مليون مصري معندناش حد يمثلنا فابنجيب أجانب يعني".
وأضاف في منشور آخر: "كبرو المواضيع بقي ووقعونا في الناس، بس أنا قولت حق ربنا لا هطبل ولا هكدب، أنا بحب هند جدًا وبحب فنها وبحترم حبها لمصر، بس بحب مصر أكتر وبحب المصريين أكتر وبحترم تاريخ بلدي أكتر وأكتر".
وتابع: "البيت أولى بيه أهله، عندنا ناس كتير تكون في الحدث ده، ليه ميكونش يسرا - سوسن بدر- روبي - حنان مطاوع - أسماء أبو اليزيد - منى زكي، ويبقي في علماء وأطباء ولاعيبة مثلا: مجدي يعقوب- محمد صلاح - رانيا علواني".
واختتم: "مصر مليانة قامات عالمية يا جماعة خلو الحدث ده يرجع السياحة اللي تعبت دي، أرجوكم استغلوا الحدث ده لمصلحة مصر فقط".
وفي منشور آخر، رد الفنان مصطفى درويش، عن انتقاد البعض له بسبب رفضه مشاركة الفنانة التونسية هند صبري في موكب نقل المومياوات الملكية من المتحف المصري لمتحف الحضارة.
وكتب درويش، عبر حسابه بموقع "فيسبوك": "المعترض على كلامي براحة طيب.. أمك ماتت ترضى حد يغسلها ولا يدفنها غير أولادها اللي عايشين وحواليها، ولا تجيب أولاد مامتك الثانية هما اللي يغسلوها ويدفنوها وأهو كلكم أخوات، هل ده يصح؟".
أضاف: "أهو نفس القصة المومياوات دول أجدادنا ودي رفاتهم ينفع حد يدفنهم غيرنا أولادهم، بس كده دي كانت وجهة نظري بعيد عن أي شخص أو اسم أو بلد، واحترامي الكامل ليهم وآسف لو كنت سبب في أي دوشة ليكي يا هند مكنش قصدي فيكي شخصيا، أنا بحبك ومن جمهورك".
تابع: "اللي يعرف هند صبري يا ريت يوصلها ده لأني أنا معرفهاش شخصيا، واقفلوا القصة دي علشان تعبت من الشرح فيها".
وكانت هند صبري أعلنت عن مشاركتها في موكب نقل المومياوات الملكية من المتحف المصري إلى متحف الحضارة.