مها أحمد تهاجم نجمين كبيرين.. وشقيقة أحمد السقا ترد عليها

في منشور عبر حسابها الشخصي على موقع "فيسبوك" هاجمت الفنانة مها أحمد نجمين كبيرين من زملائها في الوسط الفني، دون أن تفصح عن اسميهما، وصفت الأول أنه كان بمثابة الأخ، إلا أنه باعها، وأكدت أن الثاني كان سببا في دخولها بحالة من الاكتئاب.
كتبت مها "عوضي على الله دي الجملة اللي دايما بقولها لما اتصدم في أشخاص. الحكاية يا سادة نجمين عملوا مسلسل واتنجمت عليهم بنوتة لسه ألف باء تمثيل، واديتهم على..، إلى أن أصبحت بطلة المسلسل وبطلة الدعاية للمسلسل، وهما راضيين رغم إن طول عمرهم مبيعملوش كده مع أي زميلة لهم أقربها أنا".
وتابعت "النجم الأولانى بيني وبينه عيش وملح وزمالة، رُشحت فمسلسل بطولته وكان بيقنعني بدور ولما وافقت بعتولي دور تانى معرفوش، دور متعملوش واحدة مبتدئة، المفروض انه عارف قيمتي الفنية، وعارف اني إضافة له، اتهرب مني وموقفش جنبي وباعني، رغم ان الكل عارف اني زي اخته".
وأضافت مها "أما التاني كان في بداياته يتمنى يسلم عليا ويقولي يا أستاذة، نزلت من نفسي وقلتله مش هنشتغل مع بعض، ما هي الحوجة مرة رد وقالي الدور ينادي صاحبه. طبعا محكلكوش قد ايه ندمت نفسي وعشت أسود أيام حياتي عياط واكتئاب. وقلت (عوضي عليك يا رب).. تمر الايام والاتنين يعلو ويتجمعوا مع بعض في مسلسل واحد (على عينهم طبعا)، ويمثلوا وحش قوي تمثيل الكفار، وطلعوا كمان مبيقروش اللى بيمثلوه، ويتحول المسلسل والدعاية الدراما كاملة لصالحها، وهما (مخدماتية للأستاذة)".
واختتمت "يمهل ولا يهمل ابدأوا من جديد يا أوفر تمثيل، ياللي مبتقروش يا كومبارس جنب النجمة، نصيحة بلاش تتشطروا على اللي كان بينكم وبينهم عيش وملح، بلاش تتشطروا على أساتذتكوا. (عوضنا على الله). يا رب متحوجنا لحد حتى ولو كان أقرب الناس لينا".
من جانبها، وجهت فاطمة السقا شقيقة الفنان أحمد السقا، رسالة قاسية للفنانة مها أحمد بعد نشرها منشور تضمن الإساءة أحمد السقا ووصفه بـ”الندل”، واتهامها له بخيانة العيش والملح.
وكتبت فاطمة السقا، عبر حسابها الشخصي بموقع التواصل الاجتماعي “فيسبوك” منشورا جاء فيه: “الكلام ده موجه ليكي يا أستاذة، بدل ما تفضلي تمسحي ردي كل شوية.. أبهرتيني يا مها بأخلاقك العالية، وبأنك افتكرتى العيش والملح اللى كلتيه فى البيت بتاع الفنان اللى مش عارفة تقولى اسمه بس عرفتى تقولى عليه (ندل) اللى هو أحمد السقا.. بس أنا باقولك قدام الناس، قطع لسان أى حد يقول عليه كده لأنه راجل أكرمك ووقف جنبك أنت ومجدى بدل المرة ألف”.
وتابعت: “وأمير كرارة برضو راجل جدع ومحترم للى ما يعرفهوش فى البوست بتاعك ده.. معرفش إيه الفرص اللى كانت عندك اللى كان يتمنى يشتغل معاكى فيها زمان، بس هو أى حد يتمنى يشتغل معاه دلوقتى أكيد.. وكلمة الدور بينادي صاحبه دى بتاعة أفلام.. ما بتتقالش فى الحقيقة.. كفايا دراما وتشويه للناس..وبعدين هما كممثلين مش مطالبين يقفوا جنبك ولا يجيبولك أدوار على فكرة.. دى رؤية مخرج وناس بتوع كاستنج”.
واستطردت: “الحقيقة أنا مش عارفة أنت عايزة إيه.. أنا مش شايفة بعد العشرة الطويلة اللى أنت قولتى عليها غير كمية الحقد والسواد والشماتة اللى كانوا متداريين ورا ابتسامة كدابة، معرفش أنت إزاى كنتى بتدخلى بيوتنا الصراحة وأنت ست وحشة كده”.
وأكملت :"نسيت أقولك السب والتطاول ده بيدل على الأصل.. وأحنا بقى ولاد ناس، مع أننا عندنا كلام كتير أوي يتقال".
يُذكر أن أخر ظهور لمها أحمد، كان مشاركتها كضيفة شرف في مسلسل "عمر ودياب"، بطولة مصطفى خاطر وعلي ربيع، والذي عُرض في السباق الرمضاني قبل الماضي 2020.