بعد رسالته في عيد ميلادها.. رامي جمال يعتذر لزوجته
بعد تعرضه للهجوم إثر رسالته الأخيرة في عيد ميلاد زوجته، نشر المطرب والملحن المصري رامي جمال عبر صفحته الرسمية علي موقع تبادل الصور والفيديوهات "انستجرام" صورة جديدة له برفقة زوجته ناريمان، موجها لها الاعتذار على ما سببته تهنئته لها بعيد ميلادها من حالة جدل بين متابعيه.
وعلق "جمال" على الصورة، قائلاً:" أسف لو اتضايقتي يوم عيد ميلادك مني بشكل مباشر او غير مباشر.. اصابني عدم التوفيق في استخدام كلامك وهزار اعتبره البعض استهزاء او انتقاص من اهم شخص في حياتي رغم اني عارف وواثق في تفكيرك وطبيعة حياتنا اللي بمميزاتها وعيوبها قررت انها تكون مش للعلن".
وأضاف: “الآراء السلبية اللي شفتها واللي انتى شفتيها لمجرد محاولتك اثبات ان كلامي عنك هو أصلا بوست ليكي قبل البوست بتاعي جدعنة منك غير مستغربة للاسف قوبلت بانك شفتي فعلا كلام من البعض يضايق وبما اننا عايشين مع ناس ف انا بعتذر لك عن اللي حستيه بسبب هزار عارف انك قابلاه بس من حب ربنا فيكي ومن سوء التوفيق ليا ان الناس شافته إهانة وقررت تدافع عنك.. من غير كلام كتير أسف لك واسف للي ضايقهم الموضوع وشكرا جدا ليكي واللي فهموا قصدنا من الأول”.
واختتم رامي جمال تعليقه قائلا: "بس الدرس المستفاد اني غلطت في نشر حياتي للعلن اوعدكم مفيش كلام غير في اللي بشتغل فيه، بحبك".
واحتفل رامي جمال أمس الثلاثاء بعيد ميلاد زوجته، ووجه لها رسالة قال فيها:" يارب انت عارف اني اتجوزتها وهي عيد ميلادها ذكري الزلزال القوي اللي جه مصر وانهارده عيد ميلادك برق ورعد وحاجه فلة كده عرفت أنا ليه لما غنيت سقف كورونا غزت العالم، الحمد لله أننا مخلفناش لأني واثق أن ابننا كان أكيد هيبقي المسيخ الدجال، نهاية العالم هتبقي بدايتها من بيتنا كل سنة وأنتي أول وآخر وأحلي وأرخم حاجة في حياتي بفكر اطلقك علشان أخد الدريسينج والحق يرجع لأصحابه، عيد ميلاد سعيد".
يذكر أن آخر أغنيات رامي جمال "خليكي" تخطت نصف مليون مشاهدة بعد يومين من طرحها عبر موقع "يوتيوب"، وهي من كلمات أحمد تبارك، وألحان غريب، وتوزيع سام، وميكس وماستر ماهر صلاح.
