أحمد السقا يكشف تفاصيل جديدة عن أزمته مع مها أحمد
كشف النجم المصري أحمد السقا تفاصيلا جديدة عن أزمته مع الفنانة مها أحمد، والتي شغلت الجمهور ورواد السوشيال ميديا بعد عرض مسلسله الأخير "نسل الأغراب" في موسم رمضان 2021.
وقال السقا خلال لقائه في أولى حلقات برنامج "حبر سري" على قناة "القاهرة والناس" :" تصريح مها أحمد لم يضايقني وأقسم بالله محصلش اني طلبت من والدتي ترد عليها بعد الهجوم علي فوالدتي مربية زوجها الفنان مجدي كامل".
وأضاف: "اللي ما بيني وبين مها أحمد ومجدي كامل عشرة عمر وأكبر من إنه يضيع عشان ذلة لسان من أي حد فينا".
وتابع: "الواحد ممكن في لحظة عصبية لسانه يفلت ويبقى عنده ذلة لسان.. ممكن يكون عندها وجهة نظر صح إحنا مش عارفينها".
وكانت الفنانة مها أحمد، قد أثارت جدلا واسعا بمنشور اعتبره البعض هجوما على أحمد السقا وأمير كرارة، إذ كتبت: "عوضي على الله دي الجملة اللي دايما بقولها لما اتصدم في أشخاص، الحكاية يا سادة نجمين عملوا مسلسل واتنجمت عليهم بنوتة لسه ألف باء تمثيل، واديتهم إلى أن أصبحت بطلة المسلسل وبطلة الدعاية للمسلسل، وهما راضيين رغم إن طول عمرهم مابيعملوش كده مع أي زميلة لهم أقربها أنا".
وتابعت: "النجم الأولانى بيني وبينه عيش وملح وزمالة، رُشحت في مسلسل بطولته وكان بيقنعني بدور ولما وافقت بعتولي دور تاني معرفوش، دور متعملوش واحدة مبتدئة، المفروض إنه عارف قيمتي الفنية، وعارف إني إضافة له، اتهرب مني وموقفش جنبي وباعني، رغم إن الكل عارف إني زي أخته".
وأضافت مها: "أما التاني كان في بداياته يتمنى يسلم عليا ويقولي يا أستاذة.. نزلت من نفسي وقلتله مش هنشتغل مع بعض؟ ما هي الحوجة مرة رد وقالي الدور ينادي صاحبه.. طبعا محكلكوش قد إيه ندمت نفسي، وعشت أسود أيام حياتي عياط واكتئاب. وقلت (عوضي عليك يا رب).
استكملت: "تمر الأيام والاتنين يعلو ويتجمعوا مع بعض في مسلسل واحد (على عينهم طبعا)، ويمثلوا وحش قوي تمثيل الكفار، وطلعوا كمان مبيقروش اللى بيمثلوه، ويتحول المسلسل والدعاية الدراما كاملة لصالحها، وهما (مخدماتية للأستاذة)".
واختتمت: "يمهل ولا يهمل. ابدأوا من جديد يا أوفر تمثيل، ياللي مبتقروش يا كومبارس جنب النجمة.. نصيحة: بلاش تتشطروا على اللي كان بينكم وبينهم عيش وملح.. بلاش تتشطروا على أساتذتكوا. عوضنا على الله. يا رب متحوجنا لحد حتى ولو كان أقرب الناس لينا".
أحمد السقا حصل مؤخرا على جائزة الإبداع الإنجازي على مجمل أعماله، ودوره الرائد في صناعة أفلام الأكشن بمصر، وذلك في الدورة الخامسة من عمر مهرجان الجونة السينمائي.
كما أعلن السقا تعاقده بشكل رسمي على بطولة الجزء الثالث من مسلسل "الاختيار" أمام النجمين كريم عبدالعزيز وأحمد عز، والمقرر عرضه خلال موسم رمضان 2022.
