تفاصيل الألبوم المقبل لرامي صبري

كشف المطرب المصري رامي صبري عن تفاصيل ألبومه المقبل عبر حسابه على موقع تبادل الصور "انستجرام"، كما أجاب صبري على بعض تساؤلات جمهوره، وقال صبري :"بيوصلني مسجات كتير أوي وبشوف كومنتات كتير أوي على إنكم عايزين الشغل الجديد يبقي زي الفترة الأولي اللي هي ألبوم حبيبي الأولاني وغمضت عيني، يعني عاوزين أغاني هادية كتير".

وأضاف: "أولا أنا بعمل أغاني هادية كتير جدا في كل ألبوم لأني بحبها، وثانيا عشان عارف إن الجمهور الأكبر بيحب الأغاني الرومانسية والدرامية".

وتابع: "لكن لما بتيجي تعمل ألبوم، بتلاقي إن لازم نعمل كل الأنواع عشان كمان يبقي فيه تنوع أكثر في أشكال الأغاني وعشان الأغاني السريعة تشتغل في حفلات وأفراح ومناسبات الجمهور يسمع الاغاني في كل الأماكن".

وأوضح صبري :"أنا كمان كفنان مصري أقدر أنافس وأكبر اسمي بحتاج نوعية الأغاني السريعة عشان دايما الأغاني السريعة هيا اللي بتقدر بيها تخلي الناس تفرح أكتر مثلا زي الآخر أغنيه مبروك علينا، فمعلش إني مبعملش كل الألبوم أغاني هادية عشان الأسباب اللي قولتها في البوست".

وأشار: "الألبوم الجاي هيبقي فيه 5 أغاني دراما إن شالله، وأخيرا أتمني التوفيق والنجاح دائما لكل الناس".

يذكر أن رامي صبري قرر السفر لتركيا لتصوير وتسجيل أغاني ألبومه المقبل ، بعد اختيار الأغنيات التى سيتم تسجيلها فى الألبوم المقرر طرحه عام 2019، ومن المقرر أن يتعاون صبرى مع مجموعة مميزة من الملحنين والشعراء فى الألبوم الجديد.